من اروع ما كتب بيرم التونسى

الضرائب

يسرني و يهنيني أدفع ضرايب على عيني
أدفع ألوفي و ملاييني لكن تعالوا حاسبوني
أكون سعيد و أكون شافع لو تتصرف على شيء نافع
مثلاً مصانع و مدافع و لا على القصر العيني
و اقطع لكم لحم كتافي و أبيع هدومي و لحافي
و لااشوفش جايع و لا حافي يغمني و يبكيني
و بادعي أيام و ليالي أشوف كده السد العالي
و أقول دا مبني من مالي و كد إيدي و جبيني
و يا سلام لما تجيلنا ... النفاثات مع أساطيلنا
يومها صحيح نبقى وصلنا و اقول يا عالم هنوني
و ابات مضمضم متكدر... لما الضريبة تتبحتر
مهيه للأستاذ بعجر ... و عبده شخرم بسيوني
اللي ابنه بعته ف أوروبا و من فلوسي بيتربى
قريب يعود زي الضربه و يقول مع والدي خدوني
جثه على المكتب قاعده أو في القهاوي متواعده
ماهيش سياسة و لا عداله الأمة نصها شغاله
و نصها التاني عاله يتبط و يقول رقوني

************


يا اهل المغنى



يا اهل المغنى دماغنا وجعنا دقيقه سكوت لله

داحنا شبعنا كلام ماله معنى يا ليل و يا عين و يا آه



طلعت موضه غصون و بلابل شابط فيها حزين

شاكي و باكي و قال مش عارف يشكي و يبكي لمين

و اللي جابت له الداء و الكافيه طرشه ماهش سامعاه

يا اهل المغنى دماغنا وجعنا دقيقه سكوت لله



ردي عليه يا طيور بينادي و ارمي له الجناحين

و انت كمان يا بابور الوادي ، قل له رايح على فين

قل ليه إياك يرتاح يا بابوره ، و يريحنا معاه

يا اهل المغنى دماغنا وجعنا دقيقه سكوت لله



كل جدع فرحان بشبابه يقول في عينيه دموع

يا للي جلبتي شقاه و عذابه ، حلي لنا الموضوع

طالع نازل يلقى عوازل واقفه بتستناه

يا اهل المغنى دماغنا وجعنا دقيقه سكوت لله



حافضين عشره اتناشر كلمه ، نقل من الجورنال

شوق و حنين و أمل و أماني و صد و تيه و دلال

و اللي اتعاد ينزاد يا اخوانا و ليل و نهار هواه

يا اهل المغنى دماغنا وجعنا دقيقه سكوت لله

****************

باريس خلاص



يا مسلمين لما اسكندر حكم على الدنيا و دبر
شاف المداين و اتخير اسكندرية و سماها

يوناني و يحب الغارة و رخره زيه ام منارة
جبار و عاشق جباره طلع هواه وفق هواها

اسكندر اللي بجنوده الشرق و الغرب ف إيده
و الإنس و الجن عبيده باسكندرية بيتباهى

وافقت عظمته و جبروته لا يفوتها لحظة و لا تفوته
الإمبراطور في تابوته نايم هنا تحت ثراها

أما احنا يا اسكندرانية طالعين جميعاً شضلية
طبيعة في الطين و الميه متركبة تحت سماها

الاسكندراني إذا صافح يغلط ساعات و يروح ناطح
وارثها عن جده الفاتح فحل الملوك اللي حماها

الاسكندراني إذا اتحذلق جلنف لكن له مبدأ
يغواه لحد ما يتزحلق في نايبة عمره ما ينساها

الاسكندراني إذا اتحمس يفقد صوابه و يتطلمس
لحد ما يروح متكربس في نقرة إبليس يخشاها

لكن يقوم يغسل وشه و يروح يجيب اللي غشه
خلقته و يرح ناتشه راسين يعيش مسخة بعاهة

و نا اللي جيت من سياله فيها العيال و الرجاله
شجعان و لكن بهباله يا ننتصر يا أكلناها
*************

الفلاح



الأولة آه و التانية آه و التالتة آه

الأولة : عيروني ، إن انا فلاح
و التانية : أزرع و أقلع للي نام و ارتاح
و التالتة : آه اللي احبه شط مني و راح

الأولة : عيروني ، إن انا فلاح - بدفيه
و التانية : أزرع و أقلع للي نام و ارتاح - في دهبية
و التالتة : آه اللي احبه شط مني و راح - في صبحية

الأولة : عيروني ان انا فلاح بدفيه - و عيشي حاف
و التانية : أزرع و أقلع للي نام و ارتاح في دهبية - بميت مقداف
و التالتة : آه اللي احبه شط مني و راح في صبحية - ما قاللي عواف

الأولة : مش بإيدي دا قضا محتوم
و التانية : و مسيرها ناس تغرق و ناس حاتعوم
و التالتة : ميت هم يرحل ألف هم يدوم

الأولة آه
و التانية آه
و التالتة آه